Անդրանիկ Նիկողոսյանի հոգեբանական խնդիրներն ու եկամտաբեր խարդախությունները

Հետխորհրդային շրջանում շատերը խաղալիք հեռախոս էին պահում գրպանում կամ ասենք՝ Մոսկվայում ունեցած բիզնեսի մասին պատմություններ հորինում՝ շրջապատողների մոտ իրենց գոյությանը կարևորություն հաղորդելու ու իրենց ոչնչով աչքի չընկող անձը արժևորելու համար: Ժամանակները փոխվել են. այսօր հեռախոս կա յուրաքանչյուրի գրպանում…

Այս բոլոր մարդկանց միավորում է միևնույն հոգեբանական խնդիրը, այն է՝ իրական և իդեալական «Ես»-երի անհամապատասխանությունն ու թերարժեքության բարդույթը:

Իրական և իդեալական «Ես»-ի միջև առկա հակասություններ են նկատվում նաև մերօրյա «հերոսներից» մեկի՝ Անդրանիկ Նիկողոսյանի մոտ: Թերևս, այդ պատճառով է նա արտասահմանյան հեղինակավոր կառույցների անուններով ու տարբերանշաններով հասարակական կազմակերպություններ հիմնադրում ու իրեն էլ նախագահ կամ տնօրեն կարգում՝ շփոթության մեջ գցելով մարդկանց:

Անդրանիկ Նիկողոսյանին շատերը ռուսական լրտես են անվանում, մինչդեռ  վերջինի իրական նպատակը Կրեմլից դուրս գրվող փողերը փոշիացնելու համար համապատասխան հարթակներ ստեղծելն ու սեփական շահն  առաջ տանելն է:

Հայաստանում գործող մի շարք հնչեղ անուններով, բայց բովանդակային առումով որևէ արժեք չներկայացնող կազմակերպություններից մի քանիսը պատկանում են հենց Նիկողոսյանին: 

Օրինակ՝ «ԱՊՀ երկրների երիտասարդների միություն» անունը կրող հասարակական կազմակերպության ղեկավարը` խաբեությունների վարպետ, բազմաթիվ չգործող, բայց ֆինանսական աջակցություն ստացող նախագծերի հեղինակ Անդրանիկ Նիկողոսյանն է, ով ամեն տարի տասնյակ միլիոնավոր դոլարներ է ստանում Կրեմլից, իբր, հայ-ռուսական հարաբերություններն ամրապնդելու նպատակով ծրագրեր իրականացնելու համար: Իսկ թիթեռի կյանք ունեցող այդ ծրագրերը, որպես կանոն, հակառակ ռեակցիա են առաջացնում (Կիսելյովի այցին հաջորդած հանրային բողոքը վկա):  

Ի՞նչ է անում Անդրանիկ Նիկողոսյանը Կրեմլից ստացած միլիոնների հետ

Չնայած այն հանգամանքին, որ Անդրանիկ Նիկողոսյանի հիմնադրած կառույցների ու հեղինակած ծրագրերի միայն անուններն արդեն իսկ զավեշտալին են, բայց նրան, այնուամենայնիվ, հաջողվում է տարեկան միլիոնավոր դոլարներ ստանալ Կրեմլից: Մեզ առանձնապես չի հուզում, թե ինչ արդյունավետությամբ են ծախսվում Կրեմլի փողերը, մեզ համար կարևորն այն է, որ Հայաստանը ոմանց համար դարձել է օֆշորային գոտի ու «փող լվալու» հարթակ:

Վերադառնանք «ԱՊՀ երկրների երիտասարդների միություն» ՀԿ գործունեությանը:

Եվ այսպես, 2013 թվականի ամռանը «ԱՊՀ երկրների երիտասարդների միությունը»

«Ռազմավարական զարգացման ինստիտուտ» ԲԲԸ-ի հետ համատեղ «Ապագան պայմանավորված է ներկայով» խորագրով եվրասիական հայրենասիրական ճամբար էր կազմակերպել: Բայց  նախքան առաջ անցնելը կցանկանայի ձեր ուշադրությունը հրավիրել «Ռազմավարական զարգացման ինստիտուտ» ԲԲԸ-ի անվանման վրա: Առաջին հայացքից թվում է, թե սա վերլուծական կենտրոն է, մինչդեռ կոմերցիոն նպատակներ հետապնդող շինանրարական կազմակերպություն է: Այստեղ տրամաբանական հարց է առաջանում՝ ի՞նչ կապ ունեն ԱՊՀ երիտասարդներն ու շինարարական կազմակերպությունը: 

Նկատենք, որ «Ապագան պայմանավորված է ներկայով» եվրասիական հայրենասիրական ճամբարը ընդհանրապես չի կայացել, միջոցառումը նկարագրող տեքստից ու ժպտացող Անդրանիկ Նիկողոսյանի լուսանկարից բացի որևէ այլ տվյալ չկա ճամբարի մասին:

Բլոգեր Արսեն Լևոնյանը ժամանակին իր բլոգում գրել է՝ ոչ մի ճամբար էլ չի եղել: Անդրանիկ Նիկողոսյանը Գյումրի է բերել 300-ից 400 երեխաներ՝ ոչ ԱՊՀ երկրներից,  իսկ բացման արարողությունից հետո ճամբարում մնացել է ընդամենը 100 երեխա:  Նիկողոսյանը նույն օրն անհետացել է՝ «քցելով» «Արմավ» հանգստյան տան սեփականատիրոջը՝ Գարուշ Մինասյանին: 

«ԱՊՀ երկների երիտասարդների միություն» ՀԿ-ի հաջորդ հայտարարությունը վերաբերում էր «Ռուսական գրքի» տուն մշակութային կենտրոնների և ռուսաց լեզվի անվճար ուսուցման հաստատություններ հիմնելուն:

«Ռուսական գրքի տունը», որն իրականում գրախանութ է, գործում է Երևանում՝ Մաշտոց 37/22 հասցեում: Թե հիշատակված գրախանութը ինչպես է նպաստում Հայաստանում ռուսական արժեքների տարածմանը միայն Աստված գիտի:

Ինչ վերաբերվում է ռուսաց լեզվի անվճար ուսուցման հաստատություններին, ապա հասարակական կազմակերպության կայքում գրված է, որ «շնորհիվ ԱՊՀ երկրների երիտասարդների  միությանը,  ՀՀ տարածքում գործում են ռուսաց լեզվի անվճար ուսուցման շուրջ 100 կենտրոններ, ուր հաճախում է մոտ 1500 մարդ»: 

Ենթադրենք նման կենտրոններ իրոք գոյություն ունեն: Բայց այստեղ հակասություն է առաջանում. «Россия сегодня» միջազգային լրատվական գործակալության  ղեկավար Դմիտրի Կիսելյովը Հայաստան կատարած վերջին այցի ժամանակ հրապարակայնորեն դժգոհություն հայտնեց մեր երկրում ռուսաց լեզվի իմացության մակարդակից: Փաստացի, այս կերպ Կիսելյովը անուղղակի հարված հասցրեց   Անդրանիկ Նիկողոսյանին՝ ակնարկելով, որ նրա այս նախաձեռնությունը ևս տապալվել է:

Բլոգեր Արսեն Լևոնյանը ռուսաց լեզվի անվճար ուսուցման կենտրոններին անդրադառնալով գրել է, որ ներկայացվող 100 կենտրոններից, ընդամենը 57-ի մասին է հաջողվել ինֆորմացիա հայթայթել: Կենտրոններից 15-ում իրոք անցկացվում են ռուսաց լեզվի անվճար դասընթացներ, սակայն ոչ թե Նիկողոսյանի, այլ ՀՀ-ում ՌԴ դեսպանատան միջոցներով:

Արդյունքում ստացվում է, որ միջազգային հեղինակավոր կառույցների անուններով հասարակական կազմակերպություններ հիմնադրելով՝ Անդրանիկ Նիկողոսյանը շփոթության մեջ է գցում մարդկանց՝ արժանանալով նրանց  վստահությանը: Մինչդեռ ընդամենը փող է «լվանում»՝ խաբելով և իրեն ֆինանսավորողներին, և թիրախային խմբին, ովքեր պետք է օգտվեին այդ միջոցներից, որոնք գնում են Նիկողոսյանի գրպանը:

Անդրանիկ Նիկողոսյանը հիմնադրել է մի կառույց, որի անունն ու գործունեության շրջանակը բացարձակ կապ չունեն իրար հետ: Միամիտ մարդուն կարող է թվալ, որ «ԱՊՀ երկրների միություն» անունը կրող կազմակերպությունը ԱՊՀ պաշտոնական մարմին է: Իսկ իրականում նա ընդօրինակել է ԱՊՀ գործադիր կոմիտեի տարբերանշանը և աննշան փոփոխությունների ենթարկելով՝ օգտագործում է այն որպես իր ՀԿ-ի լոգո:

Այս խառը պատմության մեջ հստակություն մտցնելու համար ասենք, որ «ԱՊՀ երկրների երիտասարդների միություն»-ը ընդամենը Մոսկվայում գրանցված հասարակական կազմակերպություն է: Ձեզ ենք ներկայացնում երիտասարության հարցերով զբաղվող ԱՊՀ պաշտոնական կառույցի ՝«ԱՊՀ երկների երիտասարդության հարցերով խորհրդի» պաշտոնական լիազորությունները հավաստող փաստաթուղթը: